與反對示威者的她聊天
機緣巧合下，今天認識了一位四十多歲（但望落似三十零歲）很優雅的女士。我們聊生活、信仰，也交流著對生命的不同看法，一直都很舒服，相安無事，直到我們談起了政治。
「我諗我同你嘅睇法唔係太一樣，即係你會出去，但係我……我諗我其實唔係好認同抗爭嘅人，特別係好激烈嗰啲。」
「但係你有無諗過點解佢哋會咁？溫和嘅手法其實都表達咗好多次，因為無用，所以先會有人咁……」
「我唔覺得係無用，即係政府其實都有回應，只係啲人唔收貨，我覺得啲人應該都要學識感恩。政治唔係一件簡單嘅事，政治其實好污穢，唔係你想點就點，我覺得啲人好似唔明，唔通真係林鄭可以話哂事咩？唔係㗎嘛，我覺得佢已經比之前嗰啲好，即係佢係真係有心做事（我心裡想的是：但那是好事嗎？），我覺得之前嗰啲仲離譜。」
「咁你覺得民主係唔好？」
「唔係唔好，只係民主都唔係萬能，佢都係要under一啲框架，唔係你想點就點……」
「啱呀，我哋都無覺得民主係萬能，但問題係香港而家連民主嘅框架都未有，你唔覺得個自由其實係收窄緊咩？」
「係收窄緊呀，但某程度上我覺得係因為香港人太多示威太多抗爭，所以先變成咁。」
她有點微微激動，深呼吸一口氣，說：「我諗我哋都係唔好再講呢個話題，我明白我嘅睇法同好多人都唔同，所以平時我都好少講，寧願沈默。我覺得如果因爲政治而傷害咗大家感情係一件好可惜嘅事。」
「唔係呀，我覺得你嘅態度尚可以接受，我身邊真係好少你呢種睇法嘅人，可以彼此交流下都唔錯呀。」
「因為我skip咗好多嘢無講，我諗如果我哋真係認真傾，可能都會鬧交，都係唔好喇。」
於是我們的討論告一段落，繼續分享著一些不會觸碰到彼此底線的話題，氣氛再度緩和舒適，只是我總覺得有點可惜。
這是我第一次不是從網上，而是從真實的人聽取到的相反意見。
不是五毛、三毛或一毛，也不是人云亦云只看TVB的廢佬意見，而是一個有著知識，也有著自己一套思考和價值觀的人。
我很想知道，究竟是甚麼樣的人，有著甚麼樣的背景，平日接收著甚麼樣消息，才能得出這樣的結論。
2014年之前，我從來沒有想過冷門的政治話題竟然可以如此牽動人的情緒，更沒有想到會成為破壞關係的原因之一。
不過當然，破壞感情的其實並不是政治，而是彼此的價值觀差天共地。
K說撕裂不一定是壞事，肌肉正是在撕裂過後才變得更強壯。
抗爭的路還有很長，相信會接受林鄭說辭的，很有可能根本從來不是走在街頭的人，既是這樣，我們不必介意，只管好好走穩走妥自己的抗爭之路就好。
你先要自己不會灰心，才能好好攙扶身邊的人。
雖然在街上的時候我不會嗌「香港人，加油！」，我總覺得有太多訊息比這句說話來得更重要，但在這裡，因為有時間也不趕急，我很想對每一個你都大聲鼓勵喊話：「香港人，加油！」
同場加映：社會信用評分
如果香港真的實行了這個制度，我諗我一定會俾政府扣分扣到仆街。
而我想問，我生而為人，為什麼要由你評核我的分數？
連上帝也沒有這麼做，你憑甚麼？
