Member-only story
柔韌的她 - 走一條不後悔的路
「叮咚」我來到輔導室門前。
迎接我的是位有著一頭黑髮，穿著連身裙，面帶微笑的女士。
「你好。」是把溫柔的聲音。
我也點頭問好，徐徐步進。
踏進面談室，我問：「我應該坐邊度？」
「你坐呢度呀。」她指指單邊的那個座位，然後自己在雙人沙發上坐下。
平日她就在這裡接見Client，今天她坐在Client的位置，而我坐在屬於她輔導員的位置，感覺很微妙。
「我做咗25年社工。想送一份禮物畀自己，寫低自己嘅故事。」這是她故事的開端。
我忍不住微微張口：「咁犀利？！」
所謂社工，是即使再hea做，還是很需要心力的工作。
更不要說如果你是用心的社工會chur得有幾緊要。
不單因爲接收人的負面情感，更因為需要社工接觸的必然都是些有故事的人，而故事往往伴隨著滿滿的沈重。
自從開始了「以我的文字寫你的故事」以後，我更確切明白，聆聽一個人的故事，即使只是微微的進入其生命當中，也是一件相當耗費心力的事，何況社工還要與人同行。
「我好早就清楚自己想做人嘅工作，當初有兩個機會，一係老師，二係社工。最後我揀咗做社工。」正當我以為是有甚麼崇高的理由時，她笑著說：「因為我唔鍾意咁規律嘅生活，我鍾意有變化。同埋……當時返學太遠，哈哈……」
她1994年入行，從事青少年工作，後來機緣巧合下當起駐校社工。
「嗰三年駐校真係豐富咗我好多經驗，亦係印象好深刻嘅經歷。我遇到好多唔同嘅個案，接觸到好多唔同嘅故事，包括婚前性行為、虐兒、自殺……甚至我有個client就喺我跟跟下嘅時候自殺死咗，當時對我嚟講係一個好大嘅打擊。」
我沒有回應，不如說我實在不知道應給予甚麼回應。
「嗰時supervisor都好支援我，佢話明白我擺咗好多心機落去。係囉，當時我都覺得自己盡咗力，我陪過個學生入急症，亦阻止過佢好幾次嘅自殺，我真係盡心盡力做自己所能做嘅嘢。但同時另一方面我又忍唔住懷疑自己，我係咪仲有啲嘢做漏咗？係咪仲有啲嘢做得唔夠好？」
她說人最痛苦的就是自我否定。
那段時間，她茫然不知所措。
「係喇，我可唔可以講關於信仰嘅嘢㗎？」她有禮地問。
「梗係可以啦！」雖然我不再上帝前上帝後，但絕對不是敵基督啊，我尊重每一個人獨特的經歷。
