Member-only story
我和我的「港女」朋友
「吓？！食飯一定係佢俾架。」
「有一次我跌左條頸巾落地，我望一望，無諗過要執。佢呆左一秒，後來幫我執左。」
「你會唔會覺得我好港女？」
我望著這個認識了十年以上的朋友，說：「如果唔係識咗妳咁耐，我一定會心入面諗妳個死港女。」
但我知道她不是呀。
她做著一份不簡單、不容易的工作，她知道自己要的是甚麼，沒有打算靠男人，經濟獨立，也捨得為另一半花錢花時間。
「我好了解佢。佢就好似男版嘅我，太輕鬆唔得，會頹。我對住其他人唔係咁㗎，我係tailor made for him。我覺得佢係鍾意努力去爭取我嘅認同，令我開心嘅狀態，所以幫佢喺有需要嘅時候點著返個作戰mode都係我嘅責任。」
我嘆為觀止。
腦海想起曾經瘋傳過一陣子的「14巴港女事件」。
愛情是有理說不清的。
甚麼樣的相處最合適，只有當中兩個人知道。
我笑笑。
「好彩我唔係同妳拍拖，我會攰死。」
「有啲嘢唔係我做唔到，但我想或者我選擇俾佢可以幫我做，唔係人人得㗎。其實咁佢都會開心。你唔覺咩？」她反問我。
我想了想。
「都係嘅。好似佢有時會叫我提佢啲嘢或者叫我幫佢影證件相咁，我都會開心。」
「對呀。佢之前慫恿其他男仔追我，所以佢好知道我對佢同其他男仔係唔同。大佬唔係個個話請我食飯我就會去㗎。」
果然她的男朋友也不是省油的燈。
「哇，妳男朋友好變態。不過諗落我真係好少要求人哋為我做咩。喺親密嘅關係入面，習慣咗give，好少take。更加唔夠膽ask，可能需要練習。畢竟無要求就無標準就唔會責怪人哋就唔會有怨恨。我諗我唔係唔愛自己，係唔夠勇氣。」
「要好好照顧自己呀。係責任。對自己嘅責任，都係對佢嘅責任。你唔好受，最終佢都係同你一齊承受呢啲唔好受。」
我想起了和前度一起的我。
在一起的三年半裡，我幾乎未曾發過脾氣。
我們吵架的次數大概得兩、三次。
但每一次都吵得兇。
他曾說：「你可唔可以唔好儲埋啲嘢先一次過爆，會炸死自己同我架。」
