因為節日才見面也沒有關係

「終於冇哂啲限聚令，我哋今年可以見『zoom』仔喇！」
「又扮個阿婆講嘢，幾廿歲人都仲咁百厭。」文婆婆笑着拍打身旁丈夫的肩膀。
「唔係點氹到你笑騎騎。」文伯理所當然地回應。
「正經啲！阿仔問我哋年初一去飲茶好冇？」
「梗係好啦！」說罷文伯一手拖起文婆婆的手，二人一起到社區中心練習社交舞，這是他們逢星期二的活動。

文伯和文婆婆退休後生活十分精彩，除了到社區中心參加不同活動外，二人還會與老友相約行山野餐，不過偶爾也喜歡耍廢整天窩在家。他們的口頭禪是：「人生最緊要開心！」或許因為他們的開朗與自得其樂，子女乃至孫兒都很喜歡親近他們，只是由於之前疫情才少見了。

朋友紛紛詢問兩老讓兒孫親近的竅門，他們總回答：「將心比己。你想人點對你，你就點對人囉。」

「即係點呀？」
「即係每次見到佢哋唔好咩都問一大餐，唔好苦瓜乾噉怨佢哋咁少嚟搵你，更加唔好見親面就問佢哋拎錢。」
「我關心先問佢哋啫。」
文伯忍不住開口：「關心同煩係一線之差㗎咋。你關心一個人係想溫暖佢呀嘛，如果佢都唔覺得被關懷，係咪適得其反呢？」
「佢哋如果成日嚟探我，我咪唔會埋怨囉，想當年我日日眠乾睡濕噉照顧佢哋，我…….」

文婆婆不禁打斷她的話：「唔同，係你揀生佢哋出嚟，你係有責任照顧佢哋㗎。仔女大咗有自己世界，你望都望佢哋過得好啦，圍住個老人家轉你先需要擔心。」
「噉錢𠴱度……」
「其實你都唔係唔夠洗，係想感受佢哋份心意啫。如果佢哋有錢唔通唔孝敬你咩，如果唔畀可能真係畀唔到……」
「可能只係佢哋孤寒，我每次開口講完都會有。」

文伯和文婆婆對望，二人同時想吐槽：「所以佢哋咪咁少返嚟囉。」但他們只是會心微笑，甚麼也沒說。

末了文婆婆只再多口講句：「其實啲後生有時好簡單，見到你過得好佢哋就開心，所以好好照顧自己就啱。」
文伯輕聲說：「不過你呢……可能就太照顧自己……」
文婆婆輕拍了丈夫一下。
朋友還想說甚麼，二人知道再講下去也是浪費唇舌，便藉故離去。

年初一到來，兒子和媳婦駕車來接。
到達茶樓時，女兒與女婿一早便拿了位。四周人聲鼎盛，好不熱鬧。
「今年終於可以一齊飲茶喇！」…