Member-only story
因為太認真，所以總是活得疼痛的她。
「你同我想像之中好唔同。」咖啡室中，眼前齊蔭長直髮眼大大的她微笑著說。
「因為我好細粒？」我也笑笑。
「係呀，同埋你啲文感覺比較沉鬱內斂，無諗過你會笑得咁開心……」還未來得及答話，她已接著說：「呀，不過我明㗎，有時愈唔開心嘅人會笑得愈燦爛。」
於是我知道，眼前的這個她，大概也擁抱著比一般人多一點點的甚麼。
呷一口咖啡，她緩緩說：「我小學讀國際學校，但屋企其實無錢。因為嫲嫲以前做馬姐，所以東主可以安排我免費入讀。嗰度好似另一個世界，我每日都用哂啲錢請同學食零食，但仍然融入唔到去入面，後來仲俾人bully。」腦海裡不其然描繪出小小人兒為了不被人看低，用盡方法希望可以拉近和同學的關係，最終付出一切只換來了別人高高在上的嘲笑。
呀，世界就是這樣，沒有人會欣賞你的努力，只會恥笑你的不自量力。
可是出身呀，能由得我們選擇嗎？
「中學入咗一間傳統女校，諗住可以重新嚟過。嗰時死慳死抵買咗對靚皮鞋俾自己，點知咁啱同班入面一個風頭躉撞到應一應，於是成為咗佢嘅眼中釘，又開始俾人bully。」她笑了笑。欺凌這回事，無論再輕微，還是會帶來無法磨滅的後遺症。
她不曉得自己的寶貴，與人的關係也一直存在著理不清而緊繃的張力。
她說自己是個沒有安全感的人。
「細個就依賴父母，大個就依賴男朋友。即使自細開始信主，我都將人嘅關係擺得高過上帝。」
很久沒有聽過把甚麼擺高於上帝，上帝應是我們生命中第一位的論調，我忍不住會心微笑。
很想對她說，上帝不用和甚麼競爭去獲得你的寵愛的啊，不要如此不安。
上帝自有永有，不因我們歌頌而顯得更有榮光；也不因我們貶低而變得暗啞失色。
祂始終是那個祂。
喜歡甚麼就放膽追求，重要的人就緊緊握住，只是不要忘記愛自己。
你裡頭若有足夠的愛，很多事就能迎刃而解。
雖然愛，是那麼難以擁有。
「我媽媽係個女強人，成長喺男尊女卑嘅圍村入面，早早就輟學，佢好大怨氣，但亦無可奈何。後來佢做化妝櫃小姐，搵咗好多錢，仲供埋親人讀書。爸爸係個好純嘅人，雖然中三都未畢業，但憑住自己努力，都開過物流公司，賺到下錢，可惜佢真係太純，純到有啲蠢，俾拍檔呃哂啲錢，之後又俾親戚呃埋阿爺淨低俾佢嘅身家。爸爸媽媽因爲呢啲事成日鬧交，所以我同佢哋關係都唔太好，中學開始我就成日離家出走。」
