Member-only story
其實你而家撈咩㗎？
老實講，每次聽到人咁問我，我其實都覺得好尷尬。
我心入面模擬過好多唔同答案，亦因著唔同人嘅反應嘗試不斷將答案調整。
但每一次講，我仍然會忍唔住面紅。
我問自己點解會咁？
我做緊錯事？我不務正業？我好食懶飛？
都唔係，只係因為我搵唔到食但又唔願意「腳踏實地」咁打份工。
我諗過好多次，如果我過緊同而家一樣嘅生活但賺到好多錢，咁大家對我嘅態度同我對自己嘅態度會唔會唔一樣？
會。
然後我就發現，原來一切仍然係錢作怪。
雖然理想上我哋都希望（亦知道）好多嘢唔應該用錢去衡量，但實際上我哋都無法逃出金錢呢個度量衡。
呢個唔係一種批判，我只係陳述事實。
問我嘅人都係出於善意嘅關懷同一點點嘅好奇心，正如我都一樣會問好耐無見嘅朋友或者唔係好撈得掂嘅朋友最近點，主要係擔心佢哋過得好唔好（好彩我都係大眾一份子，絕對明白大家諗法）。
所以今日我寫返個Q&A，下次有人問就send俾佢睇，順便自我整理一下。
Q：其實你而家撈緊咩？
A：我好想答我係作家，咁大家個腦就唔會kick住喺度，可惜我出咗半本書之後就再無出版社approach。我主要（亦希望可以）靠寫嘢維生，而家收入嚟自Medium嘅稿費同Faecbook讀者嘅贊助。次要有job接job，例如幫啲機構寫文、幫人寫自己嘅故仔、做下功輔班導師、打下啲錄音稿、接下廣告post……基本上我唔討厭嘅嘢我都會試下做。呢啲係咪叫Freelancer定Slash？唔Q知，其實我只要生活到就得。
Q：咁你搵唔搵到食㗎？
A：老實講，咁樣嘅生活我只係過咗三個月，即將踏入第四個月，除咗第一個月因為仲住喺屋企同零食箱有剩餘物資，所以有盈餘外，之後都係入不敷支，爭在個入同支距離有幾遠咁解。如果你問我，咁點算呀？無㗎，咪寫好啲文，希望多啲人睇亦多啲人願意俾錢（事實上Medium同Facebook贊助嘅收入係每個月都微微上升㗎）。當然我都可以勤力啲搵多幾份PT，不過嗰個係我最後嘅選項，因為我唔係諗住做打工達人，我係想寫作維生。
Q：你屋企人知唔知？
A：大家都知我阿媽好癲，佢份人好無安全感，唔好話我無返FT，就算我只係轉工減咗人工我都唔會俾佢知，所以我對住佢係講愈嚟愈多大話。不過如果大話可以換嚟兩個人嘅幸福，我覺得好值得。我有同哥哥講，可以唔講大話我都會誠實面對，畢竟講大話負擔其實好大，我係玩killer掘金之類做著個衰人都會好快被人發現嗰種。
