關於Dating Company，你點睇之＿＿篇
此篇廣告寫於2015年，有啲point已經唔update，例如用交友app已經唔危險，仲真係可以開花結果㗎，身邊有朋友係活生生嘅例子。
真係時移世易。
文字何價？每一個鍾意文字嘅人都幻想過靠文字維生，但每一個生喺香港又鍾意文字嘅人都知道「人活著不能單靠文字，也要食物」，於是我立志做一份工作養起呢份興趣。
不過我都奢想有一日，當我知名度夠，會有人邀請我出書、寫專欄、合作等等等等。咁就可以撻返啲只會用錢去衡量價值嘅人把口：「花咁多時間做乜？就係開心享受之餘仲有錢收！！！」
估唔到機會咁快就黎喇！居然有人揾我寫宣傳文， 但竟然係Dating Company ？！
關於Dating Company，我第一時間會諗起堂前燕寫嘅〈做過婚姻介紹中心，先明白有d女係傻嫁〉，睇下啲人幾趣致，都係食花生多。
唔知係以前年代問題定係我當年年少唔知世界殘酷，以前會覺得去得Dating Company嘅人應該自身有啲問題，所以先一直單身，最後要靠呢啲約會公司。
後來又唔知係年代轉變定我大咗個腦醒左，開始明白Dating Company呢啲只係時代嘅必然產物。
不過我估有個人都影響左我好多，嗰個就係我哥哥。
（順便招親先，唔好同我哥哥講返，shu……）
哥哥今年啱啱踏入3字頭，正正常常一個男人。
你話佢好好咩？無野做咪打下機間唔中出去同朋友玩下去下旅行咁無乜特別；你話佢好差咩？佢有時都幾幽默嫁唱歌幾好聽做野幾認真無不良嗜好。但自從幾年前同前度分左手，就一路空窗期到而家。
如果有一個normal distribution 嘅圖，佢一定係屬於中間嗰啲，照理平凡嘅人最吃香。
究竟佢發生乜事？
其實我就唔太擔心，因為男人30又話係黃金時間，去到40都仲可以叫壯年。怕咩？不過我哋位高堂就唔係咁諗喇。
媽媽幾年前已經開始為哥哥憂心，最初只係問下，繼而苦口婆心叫佢努力啲，然後轉為逼迫我要介紹女仔哥哥識，最後親自操刀叫呀姨喺大陸介紹女仔我哥哥相睇。
你唔好笑，係最近嘅事，哥哥真係被呀媽逼返左大陸相睇。
咁最後當然失敗收場，我都鬆一口氣。
不過我都開始認真幫哥哥諗下點算好，你話我衰都好，我真係唔想屋企無啦啦多咗個由大陸相睇返黎嘅呀嫂……
其實歸根究底係份職業出事，哥哥喺廚房做的，雖然已經係高級點心部，但返嘅時間都係非常長，而且shift咁放，根本唔可以有正常社交時間。
每日都長時間匿喺廚房，點會有「艷遇」？長此落去，可能真係有機會單身一輩子……
然後我腦海又浮現另一個人嘅面孔，係我一位中學老師。佢都生得幾靚，個人幾好，但都係一直單身，令人不解。不過當見到佢成日咁認真教書，又唔難明白。啲時間都用哂喺學生身上，仲邊有時間識人？於是我地成班畢業以後，成日同佢講，你唔好咁認真喇，出去放鬆下（對不起呀師弟師妹XD）
每一次，佢哋都笑而不語。
其實明嘅，時間其實總係可以有。
但去邊度搵人？
唔通真係做義工？又好似有啲立心不良，而且唔係人人都鍾意做呢啲。
上網識人？用交友app？又好似好難識到個結婚對像，而且好似好危險咁，通街報紙騙財騙色好似都係由網上識人而起。
出去蒲？人地又話你喺咩場合就搵到咩人，唔係諗住識良家婦女呀？
思前想後，我又明點解而家Dating Company開到成行成市。
香港呢個金錢至上，工作佔據一切，只有生存而沒有生活嘅城市，我哋又可以點樣遇到自己嘅另一半？
如果你唔係在學時期已出pool，有指定社交聚會/團體例如返教會搞社運，而返工見開嘅已經係絕緣體，其實真係好難好難識到另一半……
所以而家有另一半嘅我哋真係何其幸運……
我以後唔會笑去Dating Company嘅人嫁。
因為佢哋不過係運氣比較差，加上係時代嘅犧牲品。
呀，講返＿＿。
點解要揀呢間公司？唔知嫁。
除咗佢俾我嘅資料，上網輕輕search過佢。
好似幾出名。
至少佢唔係國產企業，一定唔係假，專呃你錢先。
然後佢地個配對措施好似幾OK，聽聞要答幾多問題下，務求為你搵到最適合嘅對象，會有專人跟進。
同埋佢哋已經有11年經驗。
我諗如果要試，會試得過。
有興趣朋友可以自行再google下。
可能會有人覺得連戀愛婚姻都可以係一門生意，好灰。
我就覺得其實唔係嘅，以前嘅人去舞廳跳下Cha-Cha，野下餐，又多小店，街坊鄰里大家互相認識，人情味甚濃，賒數肯定唔會成為一單新聞，當然緣份唔難遇到。
但而家社會結構已經好唔同，我地遇見緣份嘅方式點解唔可以改變？
祝福仍然係單身但想改變嘅你 : )
試試佢啦！
〈Link〉
瘋狂tag單身嘅朋友仔吧 XD
