有時,報應都需要時間。

望住每日嘅新聞,心入面成日都會大嗌「呀呀呀呀呀呀呀」。
然後少不免灰心,好憎自己做唔到啲乜。
鬧得政府警察多又會有罪惡感,注意,絕對唔係因為鬧佢哋有罪惡感,而係嬲自己除咗淨鬧佢哋之外,好似再做唔到啲可以抗衡到佢哋嘅嘢。

然後K send咗一段訊息過嚟:

11月4日 01:16
值得讚!將軍澳勇敢議員助理用法理擊退防暴
將軍澳一批防暴衝入廣明苑想大量拉市民,有議員助理兩個人衝去防暴度,用大聲公向佢地講呢度係私人地方,呢班防暴冇搜查令之下,完全冇權進入呢個私人屋苑,佢仲叫清楚:[九龍東衝鋒隊/張幫辦],呢個議員助理一早去查清楚地契,仲問哂法律意見,防暴冇法庭手令唔可以入廣明苑拉人,班防暴即時驚到走,助理提醒大家唔好亂咁走出地契範圍就冇事,呢個場面好耐冇睇到,個班防暴仲想湧埋去兇佢,但佢唔驚,每一句都講清楚法律問題,咁佢地立即離開,呢個議員助理好野!

跟住再send咗一個連登post俾我。
<長文整合> 一條timeline解釋點解廣明苑業主立案法團咁勇猛:

佢想話我知,羅馬非一日建成。

最近走上街頭,幾乎一次比一次逗留時間短。
逐漸有少少氣餒,問自己咁樣除咗送頭到底仲有咩作用。

身邊一直有唔同聲音,有啲人覺得香港日程表就係預約搜捕表,自己申請被差佬拉;有啲人又覺得如果唔行出嚟,市面回復平靜,好快香港人會返去「聖誕感恩大酬賓」、邊度去旅行好玩嘅日子……
問心,我覺得兩邊講嘅都有道理。
要走出呢個困局,相信唔少人其實都有諗法。
差在如何實行。
(唔想講咁白,一嚟用緊實名寫作,二嚟公告天下即係話埋俾對家聽你嘅張良計係咩,我諗我哋唔可以再咁蠢了。)

一諗到實行,我就覺得好難。
事關俾建議ban建議,只要願意用個腦應該都可以做到(不過我唔敢話人人都得,至少美心太子女話要放棄年青人就令人黑人問號,即係我都唔好意思厚面皮話自己要放棄做個有錢人。大佬呀,你要擁有先有得放棄㗎)。
但一講到落手落腳做,就唔係幾句或者一個意念就得。
係要花時間同心血建立出嚟。
而且無formula跟,仲會有好多手尾同屎要執。

然後K就會講一句:「開始做,就會有變化。」
千里之行,始於足下。

如果你心目中有某種諗法覺得好掂,但遲遲未實行,不如真係同朋友傾下做出嚟。
如果你話由零開始做一舊嘢出嚟你真係唔擅長,其實唔緊要,我成日話人最緊要搵到適合自己嘅位置,有啲人係好適合做領袖,但要做領袖首先下面都要有人先得。如果你無嗰種要一人之下,萬人之上嘅野心,咁即管搵個好嘅人好嘅方向去跟。
香港,其實有好多人做緊嘢,你只要留心多啲就得。
又如果,你話自己唔鍾意走入一個制度、團隊,只想做個獨行俠。其實今時今日都有好多崗位俾獨行狹參與,只要你去搵,一定會搵到。

(為免太空泛,我都係舉幾個例子:唔講勇武咁高難度嘅嘢,罷買罷食罷用呢啲最簡單,建立自己人經濟圈會用多你少少時間同心力,跟清算師一齊清算、追擊tvb廣告同藝人、善用1823作投訴……)

喺我哋埋怨自己冷嘲熱諷其他人同灰心之前,不如真係做哂自己敢做同可以做嘅嘢先。
問下自己,如果講唔出已經盡咗100%嘅力抗共救香港,咁有乜理由要放棄唔堅持?你都未試哂所有可行方法。
當然,有時情緒都會頂唔住,我發覺自己頂唔住嘅時候就會好想瞓,我諗由琴晚到今日,我斷續瞓咗十幾廿個鐘。
但係瞓醒就係另一天,就應該好好發揮自己嘅力量。
如果你相信每個人都係獨特,你就應該相信世界上有啲嘢永遠得你先可以做到。

好正面係咪?我都同人講人生最正面係2019年呢段日子。
但係係真㗎,只係有時你做咗嘅嘢都需要少少時間反映出嚟啫。

我會繼續收集呢啲有請小鳳姐嘅片段,唔係想講我哋贏5:0呢啲荒謬說話,而係想鼓勵大家包括我自己,與其灰心放棄乜都無心機做,不如間唔中齊齊數下我哋其實成功做過啲咩。
我哋未輸㗎,輸咗就聲都無得出啦已經。
我哋仲打緊仗。

唔止係我咁講㗎,幾千年前嘅聖經都係咁寫:
「我們行善不可喪志,若不灰心,到了時候就要收成。」(加拉太書 6:9)

玩命中,正在全職靠寫字維生。 Contact:charishaha@gmail.com #Facebook Page:https://www.facebook.com/hlfcharishung/ #Patreon https://www.patreon.com/charishung

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store